ផាន់ ស្រីមុី

សាកលវិទ្យាល័យជាតិបាត់ដំបង (ស.ជ.ប.ដ) គឺជាស្ថាប័នអប់រំឧត្តមសិក្សាដ៏ល្អបំផុតមួយនៅភូមិភាគពាយ័ព្យនៃប្រទេសកម្ពុជា។ ចំណុចសំខាន់ជាងគេបង្អស់ គឺសាកលវិទ្យាល័យជាតិបាត់ដំបង ជាសាកលវិទ្យាល័យរដ្ឋមួយដែលត្រូវបានទទួលស្គាល់ជាផ្លូវការដោយក្រសួងអប់រំ យុវជន និងកីឡា នៃព្រះរាជាណាចក្រកម្ពុជា។ សាកលវិទ្យាល័យផ្តល់អោយនិស្សិតគ្រប់រូប នូវវគ្គសិក្សា និងកម្មវិធីសិក្សាដែលត្រូវបានទទួលស្គាល់ទាំងនៅក្នុងប្រទេស និងឆាកអន្តរជាតិ។  ជាពិសេស សាកលវិទ្យាល័យក៏មានសាស្រ្តាចារ្យជាតិ និងអន្តរជាតិ ដែលមានទេព្យកោសល្យ និងជំនាញក្នុងការផ្ទេរចំណេះដឹងដល់និស្សិតគ្រប់រូប។ សាកលវិទ្យាល័យជាតិបាត់ដំបង មានទីធ្លាធំទូលាយ អមដោយធម្មជាតិពណ៌បៃតងដ៏ស្រស់បំព្រង។ ប្រសិនបើសិស្ស និស្សិត មានបំណងចង់សិក្សាក្នុងបរិយាកាសដ៏ស្រស់ស្អាត       និងបរិស្ថានល្អនោះ សាកលវិទ្យាល័យជាតិបាត់ដំបង គឺពិតជាជម្រើសដ៏ល្អបំផុតសម្រាប់ពួកគេ។ សាកលវិទ្យាល័យជាតិបាត់ដំបងក៏ បណ្ណាល័យ សាលភាសា បន្ទប់អនុវត្តកុំព្យូទ័រ និងបន្ទប់ពិសោធន៍សម្រាប់សិស្ស និស្សិតផងដែរ។ ជាចុងក្រោយ និស្សិតសាកលវិទ្យាល័យជាតិបាត់ដំបងអាចទទួលបានឱកាសសិក្សា និងការងារល្អ ។ អំឡុងពេលសិក្សា និស្សិតអាចចាប់យកឱកាសចូលរួមកម្មវិធីផ្លាស់ប្តូរកម្មវិធី ទៅសាកលវិទ្យាល័យដៃគូល្បីៗ នៅអាស៊ីក៏ដូចជាអឺរ៉ុប។ ជាក់ស្តែង រូបនាងខ្ញុំផ្ទាល់បានទទួលអាហារូបករណ៍ទៅសិក្សានៅ សាកលវិទ្យាល័យដ៏ល្បីមួយក្នុងប្រទេសឥណ្ឌូនេស៊ីដែល ហើយវាជាបទពិសោធន៍ដ៏កម្រ និងល្អមួយក្នុងជីវិតរបស់នាងខ្ញុំ។ សំខាន់ជាងនេះទៅទៀត នាងខ្ញុំអាចមានសមត្ថភាពប្រលងប្រកួតប្រជែង ហើយទទួលបានតែងតាំងជាគ្រូកម្រិតឧត្តមផងដែរ។ “ប្រសិនបើសិស្ស និស្សិត ចង់សិក្សានៅសាកលវិទ្យាល័យដែលមានការទទួលស្គាល់ ស្រស់ស្អាតនិ ងមានគុណភាពល្អ សូមចុះឈ្មោះចូលរៀន​ នៅសាកលវិទ្យាល័យជាតិបាត់ដំបង”

ហាក់ ចំរើន

សាកលវិទ្យាល័យជាតិបាត់ដំបង (NUBB) គឺជាសាកលវិទ្យាល័យសាធារណៈធំជាងគេរបស់ប្រទេសកម្ពុជានៅភាគពាយព្យនៃប្រទេស។ សាកលវិទ្យាល័យមាននិស្សិតអាហារូបករណ៍ និងបង់ថ្លៃសិក្សាជាច្រើនពាន់នាក់សម្រាប់កម្មវិធីសិក្សាថ្នាក់បរិញ្ញាបត្រ និងក្រោយឧត្តម។ សាកលវិទ្យាល័យកំពុង​   ផ្តល់ជូននិស្សិតនូវការអប់រំប្រកបដោយគុណភាពខ្ពស់លើគ្រប់មុខជំនាញទាំងផ្នែកវិទ្យាសាស្ត្រ និងវិទ្យាសាស្ត្រសង្គម។ តាមរយៈបទពិសោធន៍នៃការរៀនសូត្រនៅសាកលវិទ្យាល័យនេះខ្ញុំ សូមថ្លែងអំណរគុណយ៉ាងជ្រាលជ្រៅចំពោះគ្រិះស្ថានឧត្តមសិក្សានេះ​ ដែលខ្ញុំអាចបញ្ចប់ការសិក្សាប្រកបដោយកិត្តិយសពីកម្មវិធីសិក្សាថ្នាក់បរិញ្ញាបត្រ និងក្រោយឧត្តមសិក្សារបស់ខ្ញុំ។ ក្រោមការត្រួតពិនិត្យ និងការអប់រំរបស់គណៈគ្រប់គ្រង សាស្ត្រាចារ្យដែលមានបទពិសោធន៍ និងជំនាញ ក៏ដូចជាទីប្រឹក្សាផ្ទាល់របស់ខ្ញុំ ខ្ញុំបានទទួលនូវជំនាញ និងចំណេះដឹងជាក់ស្តែងមួយចំនួនដែលខ្ញុំអាចអនុវត្តបានក្នុងវិជ្ជាជីវៈប្រចាំថ្ងៃរបស់ខ្ញុំ។ មួយវិញទៀត កម្មវិធីសិក្សាត្រូវបានធ្វើឡើងស្របតាមស្ថានភាពពិភពលោកសព្វថ្ងៃ ដែលគរុកោសល្យបច្ចេកវិទ្យានិងទំនើបត្រូវបានរួមបញ្ជូលគ្នា។ ដូច្នេះ ខ្ញុំទទួលបានចំណេះដឹងតាមរយៈតុល្យភាពនៃការទ្រឹស្តី និងការអនុវត្តផ្ទាល់។

“អាស្រ័យហេតុនេះ ខ្ញុំសូមណែនាំសាកលវិទ្យាល័យជាតិបាត់ដំបងសម្រាប់ជំរើសរបស់អ្នកក្នុងការបន្តការសិក្សាថ្នាក់ឧត្តមសិក្សារបស់អ្នក”

ម៉ាន ហ្វាហ្ស៊ី

បច្ចុប្បន្ននេះ ខ្ញុំគឺជាបុគ្គលិកដែលបម្រើការងារនៅការិយាល័យអន្តរជាតិ និងទំនាក់ទំនងសាធារណៈនៃសាកលវិទ្យាល័យជាតិបាត់ដំបង ជាកន្លែងដែលខ្ញុំបានសិក្សាថ្នាក់បរិញ្ញាបត្រជំនាញបច្ចេកវិទ្យាព័ត៌មាន (IT)។ ខ្ញុំធ្លាប់បម្រើការស្ម័គ្រចិត្ត និងក្លាយជាបុគ្គលិកពេញសិទ្ធិនៅសាកលវិទ្យាល័យជាតិបាត់ដំបងចាប់តាំងពីឆ្នាំ២០១១ នៅពេលដែលខ្ញុំកំពុងសិក្សាឆ្នាំទី២។ ខ្ញុំបានទទួលវិញ្ញាបនបត្រ (Grand Award) ពីសន្និសីទ្ធអាស៊ានសម្រាប់កម្រិតបរិញ្ញាបត្រ ស្តីពីបច្ចេកវិទ្យាកុំព្យូទ័រ ក្នុងឆ្នាំ២០១៥ ដែលបានធ្វើឡើងនៅប្រទេសថៃ។ ខ្ញុំបានចូលរួមផងដែរ នូវគម្រោងស្រាវជ្រាវនានា និងកម្មវិធីផ្លាស់ប្តូរបុគ្គលិកជាមួយសាកលវិទ្យាល័យបឹងគូលូ ប្រទេសឥណ្ឌូនេស៊ី ក៍ដូចជាចូលរួមសន្និសីទថ្នាក់ជាតិ និងអន្តរជាតិជាច្រើនទាំងនៅក្នុងប្រទេសកម្ពុជា និងក្រៅប្រទេស។​ នៅឆ្នាំ២០១៧ ខ្ញុំបានទទួលអាហារូបករណ៍សហគមន៍អឺរ៉ុប រយៈពេល១០ខែទៅបន្តថ្នាក់បរិញ្ញាបត្រជាន់ខ្ពស់ជំនាញគ្រប់គ្រង នៅសាកលវិទ្យាល័យម៉ាសារិក (Masaryk University) នៃសាធារណៈឆេក។ នៅខែមិថុនា ឆ្នាំ២០១៩ ខ្ញុំត្រូវបានជ្រើសរើសចូលរួមវគ្គបណ្តុះបណ្តាលជាន់ខ្ពស់ ស្តីពីការអភិវឌ្ឍឧបករណ៍សម្រាប់ការរៀនតាមរយៈអនឡាញ នៅសាកលវិទ្យាល័យហ្គេន (Ghent University) ប្រទេសប៊ែកហ្សិក។ ក្រៅពីនេះ ខ្ញុំជាមានបទពិសោធន៍ជាច្រើនចូលជា ផ្នែកទំនាក់ទំនង ផ្នែករៀបចំកម្មវិធីជាតិ-អន្តរជាតិ និងផ្នែកផ្សព្វផ្សាយផងដែរ។​

“ខ្ញុំមានថ្ងៃនេះ ក៍ព្រោះតែសាកលវិទ្យាល័យជាតិបាត់ដំបង បានផ្តល់ពុទ្ធិ និងឱកាសជាច្រើនដល់រូបខ្ញុំ”

អ៊ាច ណងសាមីត

បច្ចុប្បន្ន ខ្ញុំជាអ្នកសម្របសម្រួលកម្មវិធីអប់រំនៅសាលាក្រោយបរិញ្ញាបត្រនៃសាកលវិទ្យាល័យជាតិបាត់ដំបង ជាកន្លែងដែលខ្ញុំបានបញ្ចប់ថ្នាក់បរិញ្ញាបត្រអប់រំ ឯកទេសភាសាអង់គ្លេស។ សិក្សានៅសាកលវិទ្យាល័យជាតិបាត់ដំបង ខ្ញុំបានទទួលឱកាសចូលរួមព្រឹត្តិការណ៍អប់រំជាច្រើន ទាំងថ្នាក់ជាតិ និងអន្តរជាតិ។ ដោយសារកម្មវិធីអប់រំ និងគ្រូបង្រៀនប្រកបដោយគុណភាពរបស់សាកលវិទ្យាល័យបានធ្វើឱ្យខ្ញុំមានសមត្ថភាពគ្រប់គ្រាន់ក្នុងការប្រកួតប្រជែងថ្នាក់អន្តរជាតិដើម្បីចូលរួមកម្មវិធីផ្លាស់ប្តូរ ការសិក្សារយៈពេលមួយឆ្នាំនៅសាកលវិទ្យាល័យ L’Aquila  ប្រទេសអ៊ីតាលី ក្រោមគម្រោងរបស់សហគមន៍អ៊ឺរ៉ុប។ នៅសាកលវិទ្យាល័យជាតិបាត់ដំបង និស្សិតទាំងអស់ទទួលបានការអប់រំផ្អែកលើទ្រឹស្តី និងអនុវត្តផ្ទាល់ទាំងថ្នាក់វិទ្យាសាស្ត្រ និងវិទ្យាសាស្ត្រសង្គម។ មិនត្រឹមតែប៉ុណ្ណោះ សាកលវិទ្យាល័យបានបំពាក់នូវគ្រឿងឧបទ្ទេសសម្រាប់គាំទ្រការរៀន និងបង្រៀនដូចជា      បណ្ណាល័យទំនើប បន្ទប់រៀនមានផាសុកភាព ជាមួយនឹងសាលកុំព្យូទ័រទំនើបៗ ដែលបានធ្វើឱ្យនិស្សិតមានអារម្មណ៍កក់ក្តៅដូចនៅក្នុងផ្ទះរបស់ខ្លួននៅពេលកំពុងសិក្សា។ វិថីនៃការសិក្សារបស់ខ្ញុំមិនត្រូវបានបញ្ចប់នៅថ្នាក់បរិញ្ញាបត្រឡើយ ដោយការជឿជាក់លើសាកលវិទ្យាល័យជាតិបាត់ដំបង ខ្ញុំបានចុះឈ្មោះចូលរៀនថ្នាក់បរិញ្ញាបត្រជាន់ខ្ពស់នៅទីនេះដដែល។ វាមិនមែនជារឿងចែដន្យ ប៉ុន្តែជាលទ្ធផលដែលបានមកពីការអប់ដែលមានគុណភាពនៅសាលាក្រោយបរិញ្ញាបត្រនៃសាកលវិទ្យាល័យជាតិបាត់ដំបង ខ្ញុំបានទទួលអាហាររូបករណ៍ថ្នាក់បរិញ្ញាបត្រជាន់ខ្ពស់រយៈពេល២ឆ្នាំទៅសិក្សានៅសាកលវិទ្យាល័យបច្ចេកវិទ្យាសុរៈណារី ព្រះរាជាណាចក្រថៃ។

“ជាមួយនឹងការអប់រំប្រកបដោយគុណភាព និងទំនួលខុសត្រូវសង្គម ខ្ញុំសូមណែនាំសាកលវិទ្យាល័យជាតិបាត់ដំបងសម្រាប់ការសិក្សានូវថ្នាក់ឧត្តមសិក្សារបស់និស្សិតគ្រប់រូប”

ណាវ ពៅបរមីណ៍

នាងខ្ញុំឈ្មោះ ណាវ ពៅបរមីណ៍ បច្ចុប្បន្ននេះនាងខ្ញុំជាមន្ត្រីរាជការបម្រើការងារនៅរដ្ឋបាលខេត្តបាត់ដំបង។ នាងខ្ញុំបានបញ្ចប់ការសិក្សាថ្នាក់បរិញ្ញាបត្រជំនាញនីតិសាស្ត្រ និងកំពុងបន្តការសិក្សាថ្នាក់បរិញ្ញាបត្រជាន់ខ្ពស់ ជំនាញរដ្ឋបាលសាធារណៈនៅសាកលវិទ្យាល័យជាតិបាត់ដំបង។ នាងខ្ញុំបានសម្រេចចិត្តជ្រើសរើសបន្តការ សិក្សាទាំងថ្នាក់បរិញ្ញាបត្រ​  និងថ្នាក់បរិញ្ញាបត្រជាន់ខ្ពស់នៅសាកលវិទ្យាល័យជាតិបាត់ដំបង​ ដោយសារនាងខ្ញុំ ជឿទុកចិត្តយ៉ាងមុតមាំលើសាកលវិទ្យាល័យ ទាក់ទងនឹងគុណភាព បរិស្ថានស្អាត បន្ទប់រៀនមានផាសុកភាព​ បំពាក់ទៅដោយសម្ភារសិក្សាទំនើបៗ សាស្ត្រាចារ្យមានសមត្ថភាពប្រកបដោយវិជ្ជាជីវៈ​ និងមានបណ្ណាល័យដ៍ធំ មួយដែលឆ្លើយតបទៅនឹងតម្រូវការសិក្សាស្រាវជ្រាវរបស់និស្សិត។ ជាពិសេសនាងខ្ញុំទទួលបានចំណេះដឹង យ៉ាងពិតប្រាកដទាក់ទងនឹងជំនាញដែលបានសិក្សា និងទទួលបានឱកាសជាច្រើនអំឡុងពេលសិក្សាដូចជា ការប្រកួតប្រជែងទាំងក្នុងសាកលវិទ្យាល័យ​ផ្ទាល់ និងការចូលរួមប្រឡងសមត្ថភាពជាមួយបេក្ខភាពដទៃដើម្បី ក្លាយជាមន្ត្រីរាជការមួយរូបដូចពេលបច្ចុប្បន្ន  ព្រមទាំងទទួលបានឱកាសដ៏វិសេសវិសាលមួយដែលបាន ផ្លាស់ប្តូរ ការសិក្សារយៈពេល១០ខែនៅសាកលវិទ្យាល័យឡាគីឡា ប្រទេសអ៊ីតាលី​ ក្រោមគម្រោងរបស់សហគមន៍ អ៊ឺរ៉ុបក្នុងឆ្នាំ២០២៣។ ការជ្រើសរើសសាកលវិទ្យាល័យមួយដើម្បីបន្តការសិក្សា គឺពិតជាចាំបាច់ណាស់ដើម្បី បង្កើនសមត្ថភាព​ និងចំណេះដឹងរបស់អ្នក។​ នាងខ្ញុំជឿជាក់ថា ការសិក្សានៅសាកលវិទ្យាល័យបាត់ដំបងមិន ត្រឹមតែជាមាគ៌ាឆ្ពោះទៅរកភាពជោគជ័យប៉ុណ្ណោះទេ​​ ប៉ុន្តៃជាជម្រើសដ៏ល្អមួយដើម្បីដឹកនាំឱ្យអ្នកមានអនាគត ត្រចះត្រចង់ និងសម្រេចគោលដៅរបស់អ្នកក្នុងពេលខាងមុខ។

ឈុនឆុំ រ័ត្ននីកា

អំឡុងពេលនៃការសិក្សារបស់ខ្ញុំនៅសាកលវិទ្យាល័យជាតិបាត់ដំបងគឺពិតជាបានធ្វើឱ្យខ្ញុំផ្លាស់ប្តូរជាខ្លាំង។ ជានិស្សិតថ្នាក់បរិញ្ញាបត្រជំនាញវិទ្យាសាស្ត្រសេដ្ឋកិច្ចនៅទីនេះ ខ្ញុំបានប្រលូកនៅក្នុងកម្មវិធីសិក្សាមួយដែលផ្តល់ការយល់ដឹងស៊ីជម្រៅទៅលើទ្រឹស្តី ការអនុវត្តន៍ជាក់ស្តែង និងការវិភាគទៅលើម៉ូដែលសេដ្ឋកិច្ច។ ជាងនេះទៅទៀត បន្ទាប់ពីខ្ញុំបានបញ្ចប់ថ្នាក់បរិញ្ញាបត្រ ខ្ញុំបានទទួលឱកាសចូលរួមក្នុងកម្មវិធីផ្លាស់ប្តូរការសិក្សថ្នាក់អនុបណ្ឌិតរយៈពេលមួយឆមាសនៅសាកលវិទ្យាល័យ ឡាគីឡា ក្នុងប្រទេសអ៊ីតាលី។ បទពិសោធន៍នេះធ្វើឱ្យខ្ញុំយល់ដឹងពី វប្បធម៌ ពង្រីកទស្សនៈ និង បង្កើនទំនុកចិត្ត របស់ខ្ញុំ នៅក្នុងបរិស្ថានថ្មី។ ខ្ញុំសូមថ្លៃង អំណរគុណ ចំពោះ សាកលវិទ្យាល័យ ជាតិបាត់ដំបង ដែល បានផ្តល់នូវចំណេះដឹងនិងបទពិសោធន៍ល្អៗ ឱ្យខ្ញុំ ដើម្បី ពង្រឹងខ្លួន ក្នុង វិស័យ សេដ្ឋកិច្ច។ ការអប់រំដែលខ្ញុំបានទទួលនៅទីនេះពិតមានតម្លៃមិនអាចកាត់ថ្លៃបាន ទាំងសម្រាប់ការអភិវឌ្ឍន៍ផ្ទាល់ខ្លួន និងវិជ្ជាជីវៈ។

ទោ សុម៉ាវត្តី

ខ្ញុំឈ្មោះ ទោ សុម៉ាវត្តី ជានិស្សិតឆ្នាំទីមួយ នៃកម្មវិធីបរិញ្ញាបត្រជាន់ខ្ពស់ក្នុងជំនាញការគ្រប់គ្រងការអប់រំ នៅសាកលវិទ្យាល័យជាតិបាត់ដំបង។ ខ្ញុំមានអារម្មណ៍សប្បាយរីករាយណាស់ដែលបានចូលរួមសិក្សានៅបរិយាកាសសិក្សាដ៏សម្បូរបែបនិងមានគុណភាព។ ជាពិសេសសាកលវិទ្យាល័យបានផ្ដល់ឱកាសដ៏អស្ចារ្យសម្រាប់ការអភិវឌ្ឍផ្ទាល់ខ្លួន និងវិជ្ជាជីវៈ ទាំងនៅក្នុងប្រទេស និងក្រៅប្រទេស។
សាកលវិទ្យាល័យផ្ដល់បទពិសោធន៍ចម្រុះជាច្រើន តាមរយៈព្រឹត្តិការណ៍ សិក្ខាសាលា កម្មវិធីប្ដូរប្រសិទ្ធភាពក្នុងសាកលវិទ្យាល័យ និងសកម្មភាពផ្សេងៗ ដែលលើសពីការសិក្សាក្នុងថ្នាក់។ បទពិសោធន៍ទាំងនេះបានជួយឲ្យខ្ញុំពង្រឹងចំណេះដឹង និងជំនាញជីវិតយ៉ាងខ្លាំង។ ជាងនេះទៅទៀតគ្រូបង្រៀននៅទីនេះសុទ្ធសឹងមានជំនាញខ្ពស់ និងមានបំណងចិត្តល្អក្នុងការបង្រៀន និងចែករំលែកបទពិសោធន៍ ដោយឧស្សាហ៍ព្យាយាមជួយសិស្សក្នុងកំឡុងពេលសិក្សា។ ជាចុងក្រោយខ្ញុំសូមណែនាំឲ្យនិស្សិតដែលមានបំណងចង់បន្ថែមចំណេះដឹង និងស្វែងរកឱកាសថ្មីៗក្នុងអំឡុងពេលសិក្សា ឱ្យចូលរៀននៅសាកលវិទ្យាល័យជាតិបាត់ដំបង។

ហេង លាងអ៊ី

នាងខ្ញុំឈ្មោះហេង លាងអ៊ី ជានិស្សិតថ្នាក់បរិញ្ញាបត្រជំនាញសាកវប្បកម្ម ឆ្នាំទី៣ ក្នុងមហាវិទ្យាល័យកសិកម្ម និងកែច្នៃអាហារ នៃសាកលវិទ្យាល័យជាតិបាត់ដំបង។ ការសិក្សានៅសាកលវិទ្យាល័យជាតិបាត់ដំបង គឺជាបទពិសោធន៍ដ៏ល្អបំផុតមួយក្នុងជីវិតរបស់ខ្ញុំ។ បរិយាកាសលដែលល្អដល់ការរៀនសូត្រ អ្នកបង្រៀនដែលមានកាវិជ្ជាជីវៈខ្ពស់ និងបូករួមក្រុមស្សិតដែលបានបង្កើតឲ្យមានអារម្មណ៍ថា សាកលវិទ្យាល័យនេះមិនមែនត្រឹមជាកន្លែងសិក្សាប៉ុណ្ណោះទេ ប៉ុន្តែជាទីកន្លែងសម្រាប់ការលូតលាស់ផ្នែកវិជ្ជាជីវៈ និងជីវិតផ្ទាល់ខ្លួន។ អ្វីដែលធ្វើឲ្យពេលវេលារបស់ខ្ញុំនៅ NUBB កាន់តែពិសេស គឺមិនមែនដោយសារការអប់រំដែលមានគុណភាពប៉ុណ្ណោះទេ ប៉ុន្តែក៏ពោរពេញដោយការគោរពគ្នា និងការសហការរវាងគ្នាជាមួយនិស្សិត និងលោកគ្រូ អ្នកគ្រូទាំងអស់ ដែលជួយជម្រុញការសិក្សាឲ្យកាន់តែមានគុណភាព និងភាពងាយស្រួល។ ខ្ញុំតែងតែមានអ្នកជំរុញទឹកចិត្តជុំវិញខ្ញុំ ដែលពោរពេញដោយចក្ខុវិស័យ និងស្មារតីចង់អភិវឌ្ឍន៍ប្រទេសតាមរយៈការអប់រំ។ នៅពេលខ្ញុំត្រឡប់មកពិចារណាវិញ ខ្ញុំអាចនិយាយបានថា ពេលខ្ញុំសិក្សានៅទីនេះ គឺមានតែអ្វីល្អៗកើតឡើង។ វាជាបទពិសោធន៍ គំនិត អារម្មណ៍ និងមិត្តភាព ដែលខ្ញុំនឹងនាំតាមខ្លួននៅក្នុងជីវិតនេះ។

ធា សុខថៃ

ខ្ញុំឈ្មោះ ធា សុខថៃ ហើយបច្ចុប្បន្នខ្ញុំជានិស្សិតថ្នាក់បរិញាបត្រជំនាញសាកវប្បកម្ម នៃសាកវិទ្យាល័យជាតិបាត់ដំបង ។ ការសិក្សាលើជំនាញនេះបានផ្តល់ឱ្យខ្ញុំនូវការកោតសរសើរយ៉ាងជ្រាលជ្រៅចំពោះវិទ្យាសាស្ត្រ និងសិល្បៈនៅពីក្រោយការដាំដុះរុក្ខជាតិ ការគ្រប់គ្រងកសិកម្មប្រកបដោយនិរន្តរភាព និងការកែលម្អប្រព័ន្ធអាហារ។ តាមរយៈការបណ្តុះបណ្តាលជាក់ស្តែង និងចំណេះដឹងទ្រឹស្តី ខ្ញុំបានរៀនពីរបៀបដែលការសាកវប្បកម្មមានសារៈសំខាន់ចំពោះបរិស្ថាន សេដ្ឋកិច្ច និងជីវិតប្រចាំថ្ងៃរបស់យើង។ លើសពីនេះសាកវិទ្យាល័យជាតិបាត់ដំបង មិនមែនត្រឹមតែជាគ្រឹះស្ថានឧត្តមសិក្សាប៉ុណ្ណោះទេ តែក៏ជាកន្លែងមួយដែលផ្តល់បទពិសោធន៍ ក៏ដូចជាឱកាសទៅដល់និស្សិតគ្រប់រូប ក្នុងការអភិវឌ្ឍន៍ខ្លួន និងវិជ្ជាជីវរបស់ខ្លួន ។ ជាក់ស្តែងខ្ញុំបាទផ្ទាល់ទទួលបានឱកាសដែល ខ្ញុំមានកិត្តិយសបានចូលរួមក្នុងកម្មវិធីផ្លាស់ប្តូរការសិក្សានៅនៅប្រទេសអាឡឺម៉ង់ ជាកន្លែងដែលខ្ញុំមានឱកាសរៀនពីអ្នកជំនាញអន្តរជាតិ និងទទួលបានបទពិសោធន៍ពីបច្ចេកវិទ្យា និងការអនុវត្តកសិកម្មកម្រិតខ្ពស់។

ផាន់ សុភានិតា

ខ្ញុំឈ្មោះ ផាន់ សុភានិតា ហើយខ្ញុំគឺ​ជានិស្សិតបរិញ្ញាបត្រផ្នែកចិត្តវិទ្យា នៅសាកលវិទ្យាល័យជាតិបាត់ដំបង។ ការសិក្សារបស់ខ្ញុំក្នុងវិស័យនេះបានធ្វើឱ្យការយល់ដឹងរបស់ខ្ញុំកាន់តែស៊ីជម្រៅអំពីអាកប្បកិរិយារបស់មនុស្ស ដំណើរការនៃការយល់ដឹង និងសុខុមាលភាពផ្លូវចិត្ត។ តាមរយៈការរួមបញ្ចូលគ្នានៃការរុករកទ្រឹស្តី និងបទពិសោធន៍ជាក់ស្តែង ខ្ញុំបានទទួលការយល់ដឹងដ៏មានតម្លៃចំពោះយន្តការផ្លូវចិត្តដែលកំណត់បុគ្គល និងសង្គម។
លើសពីការសិក្សា សាកលវិទ្យាល័យជាតិបាត់ដំបង ផ្តល់ឱកាសឱ្យនិស្សិតទាំងអស់អភិវឌ្ឃសម្ថភាពផ្ទាល់ខ្លួន និងអាជីប។ ខ្ញុំមានឱ្យកាសក្នុងការចូលរួមក្នុងកម្មវិធីផ្លាស់ប្តូរការសិក្សានៅប្រទេសអ៊ីតាលី ជាកន្លែងដែលខ្ញុំបានរៀនពីអ្នកជំនាញ និងទទួលបានបទពិសោធន៍ក្នុងវិធីសាស្រ្តស្រាវជ្រាវផ្លូវចិត្តកម្រិតខ្ពស់ និងទស្សនៈឆ្លងវប្បធម៌លើសុខភាពផ្លូវចិត្ត។ បទពិសោធន៍នេះបានពង្រឹងការប្តេជ្ញាចិត្តរបស់ខ្ញុំក្នុងការជំរុញភាពធន់នៃអារម្មណ៍ ការលើកកម្ពស់សុខុមាលភាពផ្លូវចិត្ត និងការរួមចំណែកដល់វិស័យចិត្តវិទ្យា។